Auglýst eftir stuttmyndum í Sprettfiskinn

Stockfish Film Festival óskar eftir stuttmyndum í stuttmyndakeppnina Sprettfiskinn. Hámarkslengd stuttmynda er 30 mínútur og mega þær ekki vera eldri en eins árs þegar Stockfish hátíðin veðrur haldin 18.-28. febrúar 2016, myndir verða að hafa verið fullunnar 18. febrúar 2015 eða síðar. Myndir sem koma til greina eru myndir sem gerðar eru af íslenskum leikstjórum og/eða framleiðendum.

Foxes - Sigurmynd Sprettfisksins 2015

Foxes – Sigurmynd Sprettfisksins 2015

Frumsýningarkrafa er á innsendum myndum sem þýðir að stuttmyndirnar mega hvorki hafa verið sýndar í kvikmyndahúsum né öðrum hátíðum á Íslandi. Undanskyldar eru skólasýningar sem og myndir sem hafa verið sýndar erlendis.

Stockfish hátíðin var haldin í fyrsta sinn síðastliðinn febrúar og gekk hún vonum framar. Á sjöunda þúsund manns sóttu hátíðina og þar af var fjöldi erlendra kvikmyndagerðarmanna og blaðamanna en eitt helsta markmið hátíðarinnar er að leiða saman íslenska og alþjóðlega kvikmyndagerðarmenn.

Stuttmyndin Foxes hlaut Sprettfiskinn 2015, sem leikstýrð er af Mikel Gurrea og framleidd af Evu Sigurðardóttur og Askja Films. Foxes fjallar um ungan fasteignasala sem á rigningarsömu kvöldi í London þarf að sjá um tíu ára son sinn meðan hann reynir að ljúka stórri sölu. Feðgarnir eiga í erfiðum samskiptum en á meðan á þessu gengur eltir dularfullur refur þá um. Í umsögn dómnefndar segir að Foxes sé heilsteypt og einlægt verk sem á erindi við nútímann. „Næmni höfundar fyrir persónusköpun er áþreifanleg, um leið og leikstjórn er sannfærandi og örugg. Í einfaldri sögu er dregin upp mynd af raunveruleika sem ófáir munu kannast við“.

Skilafrestur er 10. janúar 2016. Sérstök valnefnd kvikmyndagerðarmanna mun fara yfir allar innsendar myndir.

Fimm myndir verða valdar inn á hátíðina og ein þeirra mun hljóta verðlaunin Sprettfiskur 2016. Tekið er á móti myndum á shorts@stockfishfestival.is. Nánari upplýsingar má finna hér.