Fyrstu kvikmyndir tilkynntar á Stockfish Film Festival 2016

SEX MYNDIR TILKYNNTAR Á STOCKFISH

Það gleður okkur að tilkynna fyrstu sex myndirnar sem sýndar verða á hátíðinni í febrúar. Meðal gesta verður Golden Globe verðlaunahafinn og tónskáldið Jóhann Jóhannsson, sem var einnig nýverið tilnefndur til Grammyverðlauna fyrir tónlist sína í Theory of Everything (2015), en hann mun fylgja eftir framúrstefnulegri stuttmynd sinni End of Summer (2014) á hátíðinni. Leikmyndahönnuðurinn László Rajk mun einnig koma og kynna myndina Son of Saul (2015) en hún fjallar um fanga í útrýmingarbúðum nasista.

 

Suttar lýsingar

Sumarlok // End of Summer – Ísland og Suðurskautslandið

11792106_865547316834189_7171308679023468374_o

SUMARLOK er tilraunakennd stuttmynd eftir tónskáldið og Golden Globe verðlaunahafann Jóhann Jóhannson. Áhorfandinn fer í dáleiðandi og lágstemmdan könnunarleiðangur um berangurslegt landslag eyjunnar Suður Georgíu og Suðurskautlandsins undir sumarlok þegar dagarnir styttast óðum. Myndin byggir á heimspekikenningu þar sem gamlar hugmyndir um náttúruna sem viðfang fegurðar og forréttinda fyrir mannskepnuna eru véfengdar. Hún er skotin á svarthvíta súper 8 filmu og undir hljómar seiðmögnuð tónlist eftir Jóhann.

 

Sonur Sáls // Son of Saul – Ungverjaland

720x405-Laszlo-Nemes-son-of-saul-review

SONUR SÁLS hverfist um ungverskan fanga í útrýmingarbúðum nasista sem tilheyrir Sonderkommandos, hópi gyðinga sem neyddir voru til að aðstoða við útrýmingu og líkbrennslu samfanga sinna. Nýstárleg og óvægin sýn á helförina sem hlaut hin virtu Grand Prix verðlaun á Cannes hátíðinni.

 

Nahid // Nahid – Íran

Untitled

Nahid heldur forræði yfir syni sínum eftir skilnað við manninn sinn, gegn því skilyrði að hún giftist aldrei aftur. Þegar hana langar að stofna heimili með nýja kærastanum sínum rannsakar Nahid hvort hún geti komist hjá skilyrðinu gegnum gloppur í flóknum skilnaðarlögum Íran. Þegar hún finnur hjáleið er óljóst hvort hún reynist bölvun eða blessun. Sýnd í Un Certain Regard á Cannes hátíðinni.

 

Victoria // Victoria – Þýskaland

maxresdefault

Victoria er stödd á næturklúbbi í Berlín þegar hún hittir hún fjóra menn sem bjóða henni með sér í kynnisferð um hina „raunverulegu“ Berlín. Áður en hún veit af er hún flækt í vef glæpa og á flótta undan lögreglunni. Einstakar borgarsenur og spennandi framvinda prýða þessa mynd sem tekin er upp í einni samfelldri töku en þessi óvenjulega myndataka tryggði myndinni Silfurbjörnin fyrir sérstakt listfengi á Berlinale.

 

Augnráð þagnarinnar // The Look of Silence – Bandaríkin og Indónesía

TLOS_GLASSES

AUGNARÁÐ ÞAGNARINNAR fylgir eftir einni mögnuðustu heimildarmynd 21. aldarinnar, ATHÖFNIN AÐ AFLÍFA (e. THE ACT OF KILLING). Hér beinir leikstjóri fyrri myndarinnar, Joshua Oppenheimer, sjónum sínum að öldruðum sjóntækjafræðingi í Indónesíu og uppgjöri hans við málaliðana sem myrtu bróður hans í skipulagðri útrýmingu stjórnvalda á meintum kommúnistum.

 

Ást í Kohn Kaen // Cemetery of Splendour – Tæland

front

„Fáir leikstjórar utan David Lynch sýna jafn mikla leikni og næmni þegar kemur að túlkun á tungumáli drauma og Apichatpong Weerasethakul“ segir gagnrýnandi Variety. ÁST Í KHON KAEN fjallar um Jenjiru, konu sem annast hermenn sem þjást af dularfullri svefnsýki og tilraunir hennar til að ráða í undarlega drauma þeirra. Myndin var sýnd í Un Certain Regard flokknum á Cannes hátíðinni.